पुणे : महाराष्ट्र राज्य माध्यमिक व उच्च माध्यमिक शिक्षण मंडळाने मार्च २०१९मध्ये घेतलेल्या दहावीच्या परीक्षेचा निकाल सहा जून रोजी जाहीर होणार असल्याचे वृत्त प्रसृत झाले होते; मात्र ते खरे नसल्याचे शिक्षण मंडळाने स्पष्ट केले आहे.
‘दहावीच्या निकालाची तारीख अद्याप जाहीर करण्यात आलेली नाही; मात्र ती लवकरच जाहीर करण्यात येईल. तोपर्यंत विद्यार्थ्यांनी, पालकांनी, तसेच शिक्षकांनी कोणत्याही अफवांवर विश्वास ठेवू नये,’ असे शिक्षण मंडळाकडून स्पष्ट करण्यात आले आहे.
आतापर्यंत दहावीच्या निकालाच्या अनेक तारखांबद्दलचे मेसेज व्हॉट्सअॅपवर फिरत होते. त्यातच, सहा जून रोजी निकाल लागण्याची शक्यता असल्याचे वृत्त काही संकेतस्थळांनी दिले; मात्र निकालाची तारीख जाहीर झाल्याचे समजून अनेकांनी ते वृत्त फॉरवर्ड केले. त्यामुळे सर्वांचाच गोंधळ उडाला होता.